Gadong kag Dimzon, nangin madinalag-on sa ika-66 nga Carlos Palanca Memorial Awards for Literature

Amot ni Gil S. Montinola.

Duha nga katapo sang Hubon Manunulat ang nagdaog sa 66th Don Carlos Palanca Memorial Awards for Literature, sanday Early Sol Gadong (Nagakaangay nga Panapton), 2nd Prize, kag Alain Russ Dimzon (Bahal nga Tuba), 3rd Prize, para sa Malip-ot nga Sugilanon sa Hiligaynon nga kategorya. Ginhiwat ang nasambit nga pasidungog sadtong ika-2 sang Septyembre 2016 sa Rigodon Ballroom, Peninsula Manila.

Una ini nga kahigayunan para kay Gadong ang pagdaog sa Palanca Awards.

Si Early Sol A. Gadong sadtong awarding ceremonies sang Palanca Awards.

“Overwhelming ang magdaog sa Palanca,” siling ni Gadong. “Dako nga kadungganan para sa akon ang mangin kabahin sa listahan sang mga tagdaug kon diin ara ang mga bonggaitan nga mga manunulat sang pungsod.”

Ikaduha naman ini nga Palanca para kay Dimzon kon sa diin sadtong 2012 ang una niya nga daog sa amo man nga kategorya. Subong man nga tuig ginbalhag ang libro ni Dimson nga Repentances and Rehabilitations nga ginbalhag sang Kasingkasing Press.

Si Alain Russ Dimzon, presidente sang Hubon Manunulat.

Magapadayon ang Hubon Manunulat sa kawsa sini nga dugangan ang pagpapagsik sang literatura sang Bisayas Nakatundan. “Tinguhaan ko pa gid nga magpadayon sa pagsulat,” dugang ni Gadong.

Ang Palanca Awards ang tuigan nga nagahatag pasidungog sa mga manunulat nga nagabulig pauswag kag tib-ong sa literatura sang Pilipinas.

Si Gadong (ikaduha gikan sa wala) kaupod ang iban nga tagdaog kag ang mga hurado sang Palanca Awards.

-------------------------------------------------------------------------------------------------------------------------------

Si Gil Salanio Montinola tumandok sang Mina, Iloilo. Nangin kabahin sya sang mga pungsodnon nga workshop sa pagsulat, kaangay sang Iyas National Writers Workshop kag Iligan National Writers Workshop. Nagdaog sya sang ikaduha nga padya para sa Short Story in Hiligaynon nga kategorya sa Carlos Palanca Memorial Awards for Literature sadtong tuig 2015.

Bantayan ang Iloilo Taboan 2016 Writers Festival!

Pagsinapol 3, Natigayon

Amot ni Noel G. de Leon.

Natigayon sang 29 Agosto 2016 ang ikatlo nga Pagsinapol sang Hubon Manunulat sa Book Latte, Robinson’s Iloilo, alas singko sang hapon. Gintambungan ang pagsinapol sang mga miyembro sang Hubon Manunulat nga sanday Norman T. Darap, Maria Dulce V. Deriada, Gil S. Montinola, Early Sol A. Gadong, Noel G. de Leon, Rey Salem, Rex Hidalgo, kag John E. Barrios.

Ginpangunahan ni John Barrios ang diskusyon sa malip-ot nga sugilanon ni Peter S. Nery (Donato Bugtot) nga una nga ginhatagan punto ang importansya sang maayo nga representasyon sang tawo kag kultura. Para kay Barrios kinahanglan nga mangin responsable ang mga manunulat ilabi na gid kon usaron nila sa ila sinulatan ang mga partikular nga tawo kag kultura sa sosyodad.

Ginsundan ini sang sugilanon ni Jonathan Jurilla (Ulan sa Bulan sang Abril) nga ginpangunahan ni Dulce Maria V. Deriada ang diskusyon sa pagsugod sa pagrebyu sang mga hitabo sa sulod sang teksto. Para kay Deriada, adbentahe ang simplisidad sang naratibo ni Jurilla ilabi na kay tuman ka komplikado sang mga karakter sini sa sugilanon. Ginpaathag man ni Rex Hidalgo nga dako ang papel sang manunulat ilabi na gid para makonteksto sang mga manugbasa ang sugilanon kon lantawon sa perspektiba sang manunulat.

Ang ulihi nga sugilanon amo ang sugilanon ni Genevieve L. Asenjo (Turagsoy). Ginpamunuan ni Early Sol A. Gadong ang diskusyon sa bulig ni Gil S. Montinola. Ginpaathag ni Gadong kag Montinola ang importansya sang pagpasulod sang bag-o nga estilo kag form sa pagsulat sang sugilanon sa Hiligaynon. Para sa ila, importante nga mangin agresibo sa pag eksperimento ang mga bag-ong tubo nga manunulat ilabi na gid ang mga nagaentra sa Palanca kag may bag-o nga sensibilidad sa ila mga sugilanon.

(Gikan sa wala: Dulce Maria Deriada, Rex Hidalgo, Norman Darap, Early Sol Gadong, kag Noel G. de Leon.)

Ang Pagsinapol isa ka bulanan nga aktibidad sang mga miyembro sang Hubon Manunulat (apang indi man limitado lang sa mga miyembro sini) kon sa diin luyag estoryahan, debatihan, kag iapresyar ang mga sinulatan sang mga manunulat sa Bisayas Nakatundan ilabi na gid ang mga sugilanon nga tagdaog sa tuigan nga kontes sang Palanca. Tinutuyo sang Pagsinapol nga dal-on sa mas kritikal nga diskusyon-diskurso ang paglantaw sa mga sinulatan sang mga manunulat.

Sa luyag magtambong sa bulanan nga pagsinapol sang grupo, makig-angot lang sa Facebook ni Early Sol A. Gadong ukon i-like ang Facebook page sang Hubon Manunulat.

------------------------------------------------------------------------------------------------------------------------

Si Noel G. de Leon sa subong nagatudlo sang Filipino sa University of San Agustin samtang iya ginatapos ang iya Master of Education (Filipino) sa University of the Philippines Visayas. Sya ang nagapamuno sang Kasingkasing Press, Inc.

Pagsirinapol 2 Ginhiwat Sadtong Hulyo 30

Nangin madinalag-on ang ginhiwat nga Pagsirinapol 2 sadtong 30 Hulyo 2016 sa may Book Latte sa Robinson's Place Iloilo.

Nangin tampok sa pagsirinapol sang mga nagtalambong ang mga sugilanon nanday Jesus Insilada, Gil Montinola, kag Alain Russ Dimzon.

Bantayan naton ang pagbantala para sa palaabuton nga Pagsirinapol 3.

Pagsirinapol

Ginhiwat sadtong ika-17 sang Hulyo 2016 ang nahauna nga Pagsirinapol, isa ka small-group discussion sang mga kabahin sang Hubon Manunulat nahanungod sa mga obra sa Hiligaynon.

Pagahiwaton ang Pagsirinapol 2 sa palaabuton nga Hulyo 30.

Magsugilanonay Kita: Tinipon nga mga Sugilanon Pangbata

Ginapabugal sang Hubon Manunulat ang pagpagwa sang Magsugilanonay Kita, tinipon nga mga sugilanon pangbata, sa West Visayas State University sa palaabuton nga 1 Disyembre 2014 alas sais sang gab-i. Ang tion amo ang Tertulya ukon Gab-i sang mga Manunulat sa palaabuton nga Ugsad ng Literatura sa Bisayas Nakatundan: Pambansang Kumperensiya sa Wika at Panitikan Hiligaynon, Kinaray-a, at Akeanon.

Suno sa Pasiuna sang editor nga si Leoncio Deriado, premyado nga manunulat kag kabahin sa Hall of Fame sang Carlos Palanca Memorial Awards:

“Duha ka sahi ang mga sugilanon nga ini. Ang iban binag-o nga pagsugid sang patu-pato nga mga natabo kuno sang mga dinag-on nga nagligad. Ang iban naman dinihon nga mga malip-ot nga sugilanon sa aton subong nga panahon. Masiling nakon nga ang tanan sang siyam nga ini maayo ang pagkasulat.”

Ang siyam ka mga sugilanon sa ini nga tinipon amo ang masunod:

     1.       Si Ani, ang Manugdala sang Kasanag ni Alice Tan Gonzales

     2.       Si Tungko kag si Laon ni John E. Barrios

     3.       Gamot ni Jonny Bernas Pornel

     4.       Ang Kanding nga si Zebra ni Dulce Maria V. Deriada

     5.       Si Pinay Pinasahi ni Gil S. Montinola

     6.       Igpat ni Norman Tagudinay Darap

     7.       Ang Sako ni Mulo ni Eliodora Labos-Dimzon

     8.       Abi, Pakta Ninyo ni Agnes Espano-Dimzon

     9.       Ang Paborito nga Duag ni Denden ni Early Sol A. Gadong

Ang kada sugilanon dugang nga ginhatagan kabuhi paagi sa dibuho ni Gil S. Montinola. Si Emmanuel A. Lerona amo ang nagdesinyo sang hapin. Si John E Barrios ang nagdesinyo sang libro.

Para sa dugang nga kasayoran, palihog duawa sa Facebook ang pahina sang Tambubo Hiligaynon.

Para sa mga interesado magbakal, palihog lang kontak kay Dulce sa telepono (0917) 633 8440.

"Maghinun-anon Kita" Lecture Forum sa Paggamit sang Hiligaynon Ginhiwat

Ginhiwat sadtong Hulyo 25 kag Setyembre 20 ang duha ka bahin sang "Maghinun-anon Kita," isa ka libre kag pampubliko nga lecture-forum kon diin gin-estoryahan ang papel kag paggamit sang Hiligaynon nga pulong sa buluthuan kag mass media sa syudad sang Iloilo. Ang ini nga programa gin-sponsor sang UP Visayas Language Program Office kag ginsuportahan man sang Hubon Manunulat, nga amo ang grupo sa likod sang Tambubo Hiligaynon.

Maghinun-anon Kita: A Forum on Hiligaynon Language

Tungod ang lenggwahe ang nagapanguna nga midyum sa pagtudlo, kinahanglan gid nga may igkasangkol sa tanan nga aspekto sini ang isa ka manunudlo. Tungod ginaimplementar na man sa subong ang Mother Tongue-based Multilingual Education, nagakaangay na gid nga matigayon ang pagsugilanon nahanungod sa husto nga paggamit sang Hiligaynon sa sulod sang hulot-buluthuan.

Ang mga nagtambong nga manunudlo kaupod ang Palanca Hall of Famer Alice Tan-Gonzales sadtong Hulyo 25, 2014

Kanday Dr. Leoncio Deriada, Rex Hidalgo, Judge Nilo Pamonag, Fernando Junsan, kag Cris Balairos ang nangin kabahin sang panel

Maghinun-anon Kita: A Forum on Hiligaynon as the Language of Mass Media

Matuod gid nga responsibilidad sang kada isa ang paggamit sang ensakto nga pulong, oportunidad man ini para estoryahan ang mga butang kaangot sang kon paano naton i-standardize kag padayunon ang maalam kag ensakto nga paggamit sang Hiligaynon nga pulong sa sulod kag gwa sang panimalay kag eskwelahan, amo man sa media parehas sang radyo, telebisyon, kag pamantalan.

Mga nagtambong sa Magninun-anon Kita sadtong Setyembre 20, 2014 sa UPV GCEB Training Room.

Kanday Dr. Leoncio Deriada, Dr. Alice Tan-Gonzalez, Joyce Ann Clavesillas, Ma. Luisa Defante-Gibraltar, Rex Hidalgo, Rex Sorza, kag John Paul Tia ang nangin kabahin sang panel

Ang pila sa mga prominente kag aktibo nga miyembro sang Hubon Manunulat nga amo ang grupo sa likod sang online publication nga Tambubo Hiligaynon ang nagapasakop man para sa sini nga kahigayunan. Kaupod nila ang pila ka media practitioners sang Iloilo sa open forum.