DANDANSOY ni Gil S. Montiinola

[Gikan sa editor: Sini nga bulan sang Hunyo, pagahatagan sang lugar sang Tambubo Hiligaynon ang mga ulihing-tubo nga manunulat sang Bisayas Nakatungdan.]

DANDANSOY

ni Gil S. Montinola

Dandansoy, palihog ako na ang kalimti

ang imong luha s’akon, indi pag-uyangi

ang aton nagliligad ‘padala sa hangin

ukon sa tubi tanan imo lang ibilin

                    

Dandansoy, palihog ako na ang kalimti

imong palangga ‘tugyan sa iban nga ‘bayi

suguri sing bag-o aton katapusan

‘di ko luyag nga tubtob subong ‘kaw nasakitan

Dandansoy, palihog ako na ang kalimti      

Mabudlay magtulog kon kahidlaw manguti

bisan ano himuon, kabudlay gid hangpon

ang natigana diri na sa tupad nakon

Dandansoy, palihog ako na ang kalimti

sa talamnan na lang ang panahon uyangi

untati bunyag ang indi m’ayo nga uyas

mahinolsol sa gugma nga imong ginpanggas

Dandansoy, palihog ako na ang kalimti

budlayan n’ako magtulog tagsa kagab-i

indi kahon sa talamnan ‘gaangot s’aton

kadagatan na ang aton dapat tabukon

* Kabahin ang ini nga binalaybay sang Kasubong sang Hangin, una nga libro ni Gil S. Montinola.