SA KASISIDMON ni Gil S. Montinola

[Gikan sa editor: Sini nga bulan sang Hunyo, pagahatagan sang lugar sang Tambubo Hiligaynon ang mga ulihing-tubo nga manunulat sang Bisayas Nakatungdan.]

SA KASISIDMON

ni Gil S. Montinola

Nagadamol na ang tun-og:

Mabugnaw ang dupoydupoy

sang hangin nga nagasulod

sa akon bintana. Ang kalamig

ang pagpalangga – nagapamukaw nga kahidlaw,

Matagsing ang huni sang siromsirom,

Patimaan nga ang mga pispis

sa sanga na nagahapon, kag ako akon,

nagahulat sa imo, nagaisahanon.

Nangampo na ang kasanag sa kadulom.

Sa pagdugo sang langit

sa gintaipan, naglapta

pakari sa akon. Ginatawag ko ikaw

subong halin diri sa bintana,

Sirom na. Kinahanglan

mo na magpauli, palangga.

Tuyo ko nga ipahatod sa hangin

ang akon mga tinaga, ilupad

ang kabug-at nga nagsupot

sa alibutod sang akon

tagipusuon kag hunahuna.

Ihutik sa imong dulunggan,

ipahibalo kon ano na kaluya

ang akon gugma. Ugaling

mga dahon lang ang nagakatublag

sa tagsa kurog sang akon tingog.

Sirhan ko na lang ining bintana.

Indi lang kadulom ang iya dala,

kundi isa pa gid ka madalom nga ginhawa.

Kamingaw. Tani mabatyagan mo

nga sa tagsa sirado sang sini nga bintana

ginagisi sang igot ang akon kasingkasing.

* Kabahin ang ini nga binalaybay sang Kasubong sang Hangin, una nga libro ni Gil S. Montinola.