SULAT ni Gil S. Montinola

[Gikan sa editor: Sini nga bulan sang Hunyo, pagahatagan sang lugar sang Tambubo Hiligaynon ang mga ulihing-tubo nga manunulat sang Bisayas Nakatungdan.]

SULAT

ni Gil S. Montinola

Daw indi ko pa mabaton

nga sobre na lang ang nagaangot sa aton.

Daw indi ko pa mabaton nga sa papel ko ginapangita

ang imong nawong. Tingog mo ang mabatian

ko sa pagsugod basa sang akon ngalan. Sa pagpanamyaw,

ang kasubo nabatyagan ko sa liko sang mga letra –

makahalawathawat ang pintok.

Kag ang kahidlaw sa kalayuon sang tagsa ka tinaga,

nagakupkop sa akon.

Nabudlayan na ako, palangga.

Mabatian mo ayhan kon sabton ko ikaw?

Pamatian mo man ayhan ang akon isabat?

Nagakipatkipat ang kingke. Bag-o lang

nasunog ang wayawaya bangod

sa sobra nga pagpalangga sa kasanag.

Nagamala ang akon tutunlan.

Masapnot magtulon sang laway,

bisan wala man ako sing may ginawakal.

Ginahanihan sang hangin ang kurtina sa bintana

dayon man sini habyoghabyog

kag ang mga sirumsirom sa sagwa nagapang-agda

mag-amba. Makailila ang kasanag sang bulan

nga nagalingling sa giha sang dingding.

Nahibal-an mo nga wala ginapabay-an sang bito-on.

Sa pagkatapos ko basa sang imong sulat,

matapos man ayhan ang akon kahidlaw?

Indi ko na mabasahan ang imo ngalan

kag basa na ang punda sang akon ulonan.

* Kabahin ang ini nga binalaybay sang Kasubong sang Hangin, una nga libro ni Gil S. Montinola.